Vuuerige ieew wis now

1989	1990	1991	1992	1993
1994	1995	1996	1997	1998
1999	2000	2001	2002	2003
2004	2005	2006	2007	2008
2009	2010	2011	2012

1989
Op 29 April 1989 hebbe vae toch dan ouch V.V. de Moosknienkes opgerichtj. Vae zeen begonne met 10 manne en vrolluj. Allein now nog eine naam. Umdet vae oppe HAVO beuk moste laeze van Koolhaas dachte vae, Mooshaas det klinktj neet dus laote vae d'r mer V.V. de Moosknienkes van maake.

1990
Op zaoterdig 24 fibberwari 1990 kwaame vae vor de ieerste kieer in aksie op Kieentj-Moezel. Vae haaje as motto "Zoee giftig as unne knien ". Heej mej krieege vae de twieedje priees in de klasse Groeete Wagens/ Groeete Minse. Op zoondig beej de Rogstaekersoptocht haaje vae met ut zelfdje motto unne ieerste priees beej de klein groeepe. Dieensdig beej ut toeet en blaosfieest hebbe vae met z'n allen waat herrie gemaaktj met trommels. Umdet vae neet un hieel jaor koste wachte deejjae vae op 2 september mej met 't 16e Doeerbieeterstoernooi beej Trinkenshof. Organizaatie waas doeer de Sauswauzen, en de Flodderbokse ginge met de ieer strieeke. Vae haaje de twieedje priees, waat mer good waas, want as dejjae 't Doeerbieeterstoernooi wintj, dan mojjae 't 't jaor d'r op organisieere.

1991
Nao vuuerig jaor langs di-j groeete wagens geloupe te hebbe oppe parallelwieeg, dachte vae det kunne vae ouch. Dus ‘n ongerstel gekochtj inne hej en mer aan ‘t lasse geslaage. Nao vol oore aan de ker gewerrektj te hebbe kwaam begin jannewari ‘t bericht de optocht waerdj aafgelasj en de boeete-aktiviteite zulle op een lieeg pitje gezatj waere. Dus de ker mer aan de kant gezatte en saame met de Flodderbokse en nog vol mieer anger vereiniginge hebbe vae mer un alternatieve optocht geloupe van kefee tot kefee, waat hieel leuk waas. Ouch ‘t Toet en Blaosfieest ging neet doeer vanwieege de golf-oeerlog. Op zoondig 8 September wuuerdj ‘t 17e Doeerbieeterstoernooi gehaoje doeer de Flodderbokse beej Blaakven. Vae deejjae weer mej, en VV de Stroezelkopkes wonne dit jaor.

1992
Indj 1991 net nao Wieert kerremes zeen vae mer weer begonne aan oees kreasie. ‘t motto waas “Vae zitte inne Lappemang, Op zaoterdig 29 fibberwari waas de optocht op Moezel. Heej wonne vae de ieerste priees. Zoondig beej de Rogstaekers wonne vae de twieedje priees. Heejnao waas ‘t op maondig uutruste vor de dieensdig. Met waat groeete eimers deejjae vae mej en vae haaje de groeetste lol. Ut waas 6 september beej Spijk te doon. De 18e versie van ‘t Doeerbieeters-toernooi (heej nao te neume DBT). En vae woore d’r al un bitje bang vor, vae wonne ut DBT, en mochte ‘t in 1993 organizieere.

1993
Alles luiptj inne sop, det waas ‘t motto vor 1993. Aangezeen vae os toch waat werrek oppe nek haaje gehaaldj met ‘t DBT, besloeete vae dit jaor toch waat kleiner te bouwe. Un Sop-kom met dae inne Sjieneeze, Jagers en Oondje, woeebeej vae dus inne sop leepe. Beej de Verkuskop haaje vae geine priees, beej de Rogstaekers haaje vae unne twieedje priees. Op dieensdig haaje vae de eimers van vuuerig jaor verwisseldj vor verkusvel, en ‘t waas gelieek ouch ‘t leste jaor det vae as V.V. de Moosknienkes aan ‘t Toet en Blaosfieest mejleepe(kiektj wieeter beej Joekskepel de Moosknienkes). As motto vor ‘t 19e DBT haaje vae ‘t Puike Pirate Fieest verzonne en dit jaor ging VV. De Prengels met de ieer strieeke.

1994
As dejjae ‘t DBT georganisieerdj hetj, dan blieektj dejjae ‘t jaor d’r op last hetj van de beruchte DBT-dip. Dit waas beej os ouch ‘t geval. Vae kwoom tot ‘t motto “Vae laote d’r gein graas oeever grui-je. Zoeewaal op zaoterdig as op zoondig kreege vae heejvor unne 3e priees. Jaomer genog haaj ouch oeese fotograaf last van unne dip, aangezeen vae hieelemaol gein foto’s van de optochte in dit jaor hebbe. Mer good, op zaoterdig 10 september deejjae vae waal weer mej met ‘t DBT. En heej van hebbe vae waal foto’s. V.V. de Deepkiekers vonge ‘t noeedig um ‘t 21e toernooi te gaon organisieere en wonne dus ouch ‘t 20e DBT.

1995
As dejjae unne dip gehatj hetj wildjae ‘t jaor d’r op in eeder geval weer good vor d’n daag koome. “Ut zitj mich neet lekker” waas ut motto en dit waas zat vor unne 2e priees op Moezel en unne 1e priees beej de Rogstaekers. In eeder geval tot now tow ein van de leukste motto’s di-j vae gehatj hebbe. Yeh, as de vastelaovundj verbeej es, keumtj roont september ‘t DBT wieer. Dit jaor op Bosseve, en zonger det vae ‘t gehoeeptj haaje wonne vae vor de 2e kieer, waat gelieek beteikendje det vae de 2 x 11 jaor jubileum editie van ‘t DBT moste organisieere.

1996
‘T jaor 1996 zochte vae ‘t beej de korstman, de Paoshaas en neteurlik Sinterklaos. As dejjae heej neet mieer in moogdj geluive, dan mojjae d’r vor zorrege dejjae zoee roont moogdj loupe. “Heej kloptj gein bol van”, waas ‘t motto, Heejvor kreege vae zoeewaal op Moezel as inne stad unne 1e priees. En dan jao, ‘t 2 x 11 jaor jubileum van ‘t DBT. Vae hebbe heej vor ‘n bukske gemaaktj vanne historie, en op vriedug ‘n reunie gehaoje met ‘n optraeje van Harrie en de GZ. Spesjaal heej vor hieef Harrie en de GZ, ‘t nummer de doeerbieters geschrieeve, Op Zoondig 1 september waas ‘t toernooi, waat gewonne es doeer V.V. de Moelemaakers.

1997
Ouch in dit jaor haaje vae wieer last van ‘ne DBT-dip. Uut ervaaring bliekj as vae unne dip hebbe det vae dan altiet met hout iets gaon bouwe. Dus fleenk waat hout gehaald, pvc-buize,katrolle, en pur( dao hebbe vae dan ouch gooj ervaaringe mej, vuueral Jos en Eric). Gae kintj de peerikke huuere neeste, dae mej kwaame vae in 1997 oppe proppe. Good vor ‘ne 2e priees op Moezel en ‘ne 1e priees beej de Rogstaekers. ‘t 23e DBT op wuuerdj gehaoje op zoondig 31 augustus op ‘t graas van sportpark St Louis. Winnaar dit jaor waas V.V. de Ongeladje Eier

1998
Gae maaktj van pepeer en gaas unne paddestool, maaktj of kouptj un sneeuwwitjepak + 6 kabouterpakke en schrieeftj dan ‘t volgendje op eur mottobord: “Ich heb ze neet alle zieeve”. Dit vonge ze op Moezel en ouch beej de Rogstaekers zat vor ‘ne ieerste priees, en saame met ‘t zitj mich neet lekker, en heej kloptj gein bol van, zeen dit toch 3 van de leukste motto’s in de loupbaan van oees vereiniging tot now tow. Op 6 september van dit jaor organisieerdje V.V. de Ongelagdje Eier ‘t 24 e DBT op ‘t graas van voetbalvereiniging Megacles. Winnaars woore V.V. La Moeer.

1999
‘t probleem met motto’s verzinne es, weej langer dejjae mej dootj met de optocht, weej meujelikker ‘t weurdj. Aangezeen det vae toch al richting 30 gaon met de gemiddeldje laeftied, dachte vae ‘t laote vae us nao un peepsjoow gaon um te kieke waat vae dao van kunne gebroeeke. Motto 1999 waas “Peepsjoow”en Watje haaj nao d’n optocht in eeder geval gein stum mieer. Op Moezel geine priees, beej de Rogstaekers ‘ne 2e priees. Vor ‘t DBT moste vae richting ‘t graas van Moezel. Vor de mieeste van os waas dit in eeder geval neet wieet fietse. V.V. de Kauvers deejjae ouch mej en wonne ‘t toernooi.

2000
In 2000 waas ‘t jaor det vae 1x 11 jaor bestonge. Vae hebbe dit gevierdj met un fieest in kefee-zaal beatrix. Dit met optraeje’s van Hermeni-j Vannix, Duo Lieelik Lomp, de John Thevissen Band, Hermeni-j de Kompeni-j, Hermeni-j Kappes Moos, Brass Bend Sentro Antiyamo Yamanota, Kepel de Baereliejers en de Bosuuleband. Ut motto in de optocht waas Heldj op Zok. Heejmej haaje vae ‘ne 2e priees op Moezel en ‘ne 1e priees inne stad. Ut waas dit jaor ouch ‘t leste jaor det vae op Moesel mej hebbe gedaon. As aafscheid hebbe vae beej de Verkuskop ‘ne knauwelpriees ingesteldj dae gemaaktj es doeer Ton Piepers. Ouch beej ‘t DBT deejjae vae dit jaor vor ‘t lest mej. Winnaars van ‘t DBT woore V.V. De Deepkiekers.

2001
Nao elluf jaor kujjae twiee kante op. Of de vereiniging valtj as unne pudding uutein of gae gootj gewoeen doeer. Motto 2001 waas Oeeverstaekendj wiltj. Met allein gooje meziek en vor de rest schoeen pakke en dan de hieele optocht mer van pebliek nao pebliek renne es waal leuk, mer vae kunne uch vertelle dejjae op maondig dan waal fleenk pieen aan eur bein hetj, mer gae motj d’r waat vor oeever hebbe. In eeder geval haaje van ‘ne ieerste priees inne Rogstaekersoptocht,

2002
Vaak kleenke motto’s leuk achter un glaas beer, mer dan es de uutveuring vervolgens hieel waat meujelikker. Dit bliek waal met dit motto. “Braobentjs Braazele deil 1: “Witte Gaajt”, Vae hebbe dan ouch besloeete um neet oeever te gaon op Braobentjs Braazele deil 2 en wieeter. As un paar geite verkledj en eemus dae de hieele optocht rooptj witte gaajt, vae weite ‘t now, neet mieer doon.Vae krieege toch nog ‘ne 2e priees inne Rogstaekersoptocht dit jaor.

2003
Gae paktj waat beuk, goesj die in ‘ne kast en gae schrieeftj uch vervolgens in onger ‘t motto: “De beuk d’r in as variant op alles uut de kast en succes verzieekerdj. Dit jaor verkledj as ruige manne, met houthakkers-bloeese en kettinge um. Mer ‘t waer waas te slecht um di-j felle kluuere van oeese kast te doon bleenke. Vae veele dan ouch boeete de prieese dit jaor.

2004
Op zoondig 22 fibberwaari ging de Rogstaekersoptocht doeer de straote van Wieert. Dit jaor haaje vao os vuuer genoome om toch hoeeger te eindige as vuuerig jaor. Ut motto waas: "Vae kunne neet hekse". Met dank aan Rogstaekerspreens Leon I vor de 10 rollators di-j vae inne optocht mej gesleiptj hebbe. Resultaat unne twieedje priees beej de klein groepe. Beej de pebliekspriees van Wieert.nl haaje vae mer 4 klein groeepe boeeve os.

2005
Ouch al moogdjae met gein laevendje bieeste de optocht in, vonge vae ut toch noeedig um met ponnies inne optocht te gaon. Op zoondig 6 fibberwaari trokke vae doeer Wieert met "Waat vingdjae van miene ponny !. Neteurlik zonger ponny's, mer waal met vol te strakke bokse en ruiterjeskes. Eederein unne schoeene ponny vor de ouge. Woeedet naoderhand de zweepkes zeen geblieeve det weite van neet, mer dao koome vae waal nog achter. Vae krieege 160 punte waat good waas vor unne twieedje priees inne optocht.

2006
Op zoondig 26 fibberwaari mochte vae wieer aanne bak. Vae haaje besloeete um mer met 'n select gezelschap mej te doon. Motto vör dit jaor waas: "Dieës gekke vlaaj leutj eur doeës kieke .!!!! Gae kuntj d'r van alles beej bedînke, mer vae woore verkledj as Ma Flodder met groeëte sigaare( 25 stöks woore net zat vör 1,5 oor optocht met 5 man) en haaje 'n vlaajdoeës inne hang met dao in neteurlik 'n gekke (veerkante) vlaaj. 't Gehieël waas good vör 161 punte, dus 'ne 2e prieës.

2007
Zeejjae Maelig, kouptj uch dan 25 kilo mael en gae kintj 'ne houp lol belaeve. Maelig waas 't motto in de Rogstaekersoptocht dae op18 fibberwari doeer Wieert trok. Dit jaor ingeschrieeve as kwartet. Ein gelök hebbe vae gehatj det 't druueg es geblieeve, want waas 't gaon raengele dan waas 't 'ne groeete puinhoup gewoeere. Met naeve os de filmcamara's van NCRV Netwerk vör Preens Hassan I, dae 'n stök mejgeloupe hieef hebbe vae de groeetste lol gehatj. 's Aovus beej de prieesuutreiking blieek det vae 168 punte haaje en dus 'ne ieerste priees.

2008
Zoee-as dejjae , un twieedje versie hetj beej Rambo, Porky's en neteurlik ouch National Lampoons, haaj-jae vae ouch un vervolg op Maelig. Gae maaktj de vriendin van eure vrind wiees det de ontgreuning binne de Moosknienkes bestieet uut ut loupe vanne optocht, en gae hetj al un bloom van un vrouwmes. Paktj de oeeverige elemente van vuuerig jaor en ut motto 2008 waerdj, waat un bloom. De humor es neteurlik wieet te zeuke, en gae motj bli-j zeen dejjae neet op eure pens gehowtj waerdj. Toch 'n ieerste priees met 165 punte beej de kwartette. Vae zölle es kieeke of vae nog waat mael oeever hebbe vör volgendj jaor.